Færslur: 2020 Febrúar

26.02.2020 17:07

Lionsklúbbur Grundarfjarðar styrkir Skotfélag Snæfellsness

Síðastliðinn laugardag hélt Lionsklúbbur Grundarfjarðar árlegt kúttmagakvöld sem slegið hefur í gegn undanfarin ár.  Innkoma af kúttmagakvöldinu er venjulega notuð til þess að styrkja góð málefni og í ár var ákveðið að styrkja íþrótta- og æskulýðsstarf.  Þeir sem hlutu styrk að þessu sinni voru Golfklúbburinn Vestarr, Klifurfell menningarhús, Ungmennafélag Grundarfjarðar og Skotfélag Snæfellsness.  

 
Við hjá Skotfélagi Snæfellsness erum ákaflega þakklát fyrir þennan rausnarlega styrk og við færum Lionsklúbbi Grundarfjarðar bestu þakkir fyrir ómetanlegan stuðning.  Þessi styrkur mun koma sér mjög vel í áframhaldandi uppbyggingar- og æskulýðsstarfi félagsins. 
 
 
 
Til upplýsingar þá stöndum við í stórræðum þessa dagana, við erum á fullu að klára skothúsið, við erum að vinna í því að reyna að fjármagna kaup á nýju 70m2 félagsheimili, leirdúfuskotvöllurinn verður endurbyggður frá grunni og við erum að skipuleggja viðburði sumarsins s.s. skotmót, unglingakvöld, konukvöld o.fl.  Við vonum að með þessum styrk getum við boðið upp á enn fjölbreyttara æskulýðsstarf og bætt aðstöðuna til íþróttaiðkunar.
 
 

16.02.2020 09:04

Kúttmagakvöld

Næstkomandi laugardag heldur Lionsklúbbur Grundarfjarðar hið margrómaða árlega kúttmagakvöld.  Boðið verður upp á fjölbreyttan mat og skemmtiaðtriði, en þessi viðburður hefur slegið í gegn undanfarin ár. 

 

Í ár verður kúttmagakvöldið tileinkað íþrótta- og æslulýðsstarfi og hyggst Lionsklúbburinn styrkja starfsemi tengda því, til frekari uppbyggingar og eflingar starfsemi.  Við hvetjum sem flesta til þess að mæta.

 

15.02.2020 19:33

Skothúsið - smíðað milli lægða

Nú hefur hver lægðin gengið yfir landið á eftir annarri og því ekki verið mikið smíðað í skothúsinu.  Við höfum þó verið að grípa í hamarinn á milli lægða og nú á dögunum var gluggi og hurð sett í dómaraherbergið í skothúsinu.

 

Búið er að kaupa timburklæðningu sem sett verður utan á húsið og grunna hana og mála.  Stefnt er að því að byrja að klæða húsið um leið og tækifæri gefst.

 

11.02.2020 21:12

Skotíþróttamaður HSH

Í lok síðasta mánaðar heiðraði Héraðssamband Snæfells og Hnappadalssýslu íþróttamenn sem höfðu staðið sig vel á nýliðnu ári og um leið var íþróttamaður HSH valinn. 

 

Okkar kona, Aðalheiður Lára Guðmundsdóttir var valin skotíþróttamaður ársins 2019 og er hún svo sannarlega vel að því komin.  Heiða Lára eins og hún oftast er kölluð var ótrúlega virk í starfi félagsins og náði frábærum árangri í sínum keppnisgreinum.  Hún keppti í nafni félagsins á fjölda móta um allt land og einnig á erlendri grundu.  Á nýliðnu ári tók hún þátt í 50 keppnum (á 50 vikum) og vann til 31 verðlauna.  Þessi mót sótti Heiða Lára um land allt og má þar nefna Keflavík, Kópavog, Snæfellsnes, Akureyri, Ólafsfjörð, Egilsstaði svo eitthvað sé nefnt og af þessum 31 verðlaunum vann hún 19 verðlaun á opnum mótum.

 
Heiða Lára tók þátt í öllum mótum sem skipulögð voru af Skotfélagi Snæfellsness á árinu 2019 nema einu, en á því móti sá hún um mótsstjórn, en Heiða Lára er formaður mótanefndar hjá Skotfélagi Snæfellsness og hefur komið að skipulgningu og framkvæmd allra móta og annarra viðburða á vegum félagsins undanfarin ár, þrátt fyrir að vera búsett á Suðurnesi. Þá gegnir hún einnig óeigingjörnu sjálfboðaliðastarfi sem gjaldkeri félagsins.
 
Eins og fyrr segir varHeiða Lára ótrúlega virk á líðandi starfsári og er óhætt að fullyrða að fáir eða engir íþróttamenn hafi keppt á eins mörgum mótum á einu ári. Heiða Lára keppti bæði í karla- og kvennaflokki og má nefna að hún varð t.d. vesturlandsmeistari  í loftskammbyssu kvenna á árinu.  Einnig tók hún þátt í móti sem haldið var í Hamminklen í Þýskalandi í október þar sem hún gerði sér lítið fyrir og vann til silfurverðlauna í BR50 flokki kvenna.  Í kjölfar góðs árangurs í Þýskalandi var henni boðið að keppa á tveimur mótum í Frakklandi og Luxemborg á næsta ári.
 
Það má með sanni segja að Heiða Lára hafi slegið í gegn á nýliðnu ári og hafi náð árangri sem erfitt er að toppa.  Heiða Lára hefur með þessum árangri sýnt að hún á mikla framtíð fyrir sér í skotíþróttinni og er öðrum íþróttamönnum góð fyrirmynd þar sem hún hefur stundað sína íþrótt af miklum áhuga og ástríðu.
 
Við óskum Heiðu Láru innilega til hamingju.
  • 1