Æfingaaðstaða Skotfélags Snæfellsness er í rólegu og fallegu umhverfi skammt frá Grundarfirði.  Landið er í eigu Grundarfjarðarbæjar og hefur félagið verið með það á leigu frá árinu 1988.  Framkvæmdir á svæðinu hófust sama ár og hefur uppbygging á svæðinu verið stöðug síðan þá.  Í dag hefur félagið yfir að ráða félagshúsnæði, riffilbraut og leirdúfuvelli (skeet).

Félagshúsnæðið:

Félagshúsnæði Skotfélags Snæfellsness  er 20 m² timburhús sem keypt var í desember árið 2001 og  flutt inn í Hrafnkelsstaðabotn á vordögum árið 2002.  Húsnæðið skiptist í alrými með litlum eldhúskróki og svo er lítil snyrting.  Umhverfis húsið er stór verönd sem snýr að leirdúfuvellinum, en húsnæðið var mikið tekið í gegn að innan og utan á árunum 2006 og 2007. (Salernið er aðeins tengt yfir sumarmánuðina).

Riffilsvæðið:

Á æfingasvæði félagsins er að finna frábært riffilsvæði með 6 öflugum riffilborðum.  Riffilsvæðið er eitt það besta hér á landi frá náttúrunnar hendi.  Þar er að finna 25m, 50m, 75m, 100m, 200m, 300m, 400m og 600m riffilbrautir, en svæðið býður upp á allt að 914m langar brautir (1000 yards).  Stefna félagsins er að bæta við fleiri brautum í mismunandi fjarlægðum.

Leirdúfuvöllurinn (skeet):

Leirdúfuvöllur Skotfélags Snæfellsness er eitt af fyrstu mannvirkjunum á æfingasvæði félagsins.  Um er að ræða hefðbundinn leirdúfuvöll (skeet-völl) með 8 pöllum, sem byggður var á árunum 1987 - 1988.  Völlurinn er af mörgum talinn með þeim erfiðustu á landinu þar sem að skotstefnan er í átt að fjallgarðinum og getur því oft verið erfitt að greina leirdúfurnar frá landslaginu.

Skothús: Sumarið  var hafist handa við að byggja 75 m2 skothús við riffilsvæðið.  Skothúsið verður af fullkomnustu gerð með 6 steyptum borðum og 11 skotlúgum.  Þar af eru 5 lúgur hugsaðar fyrir standandi skotfimi.  Í húsinu verður 10 m2 dómaraherbergi með smá kaffiaðstöðu.  Áætlað er að húsið verði tekið í notkun á árinu 2019.               Aðstaða fyrir innanhúss skotæfingar: Vorið 2017 var stofnuð skammbyssudeild innan félagsins.  Sama ár var byrjað að leita að húsnæði fyrir innanhúss skotaðstöðu.  Í lok árs 2018 náðist samkomulag við Grundarfjarðarbæ um afnot af samkomuhúsi Grundarfjarðar til bráðabirgða þar til annað húsnæði finnst.  Búið er að setja upp aðstöðu til skotæfinga í samkomuhúsinu.